牛油忌廉唧花係好吸引，不過我真係唔鍾意食，好似一啖一啖牛油食落口，我接受唔到。
所以近來我見到韓國新出的豆蓉唧花，改咗用白豆蓉為主要食材，而且有幾甜重可以自己控制，我就好想學了。
不過網上好難找到有關的教學，有的話，都是去上課的資料，我問過好幾間香港教豆蓉唧花的店，學費都是貴得難以致信，由幾千到過萬都有，一般人實在很難付擔。其實都係一門興趣啫，點解要收到咁天價呢？呢點我真係好唔明。
以下是我本人亂衝亂撞後的心得分享，在毫無名師教學下試驗了好幾次，希望為網上帶來多一點點有關這方面的資訊，令不能夠付高昂學費的香港人都可以有多啲其他人的經驗參考。
材料：
白豆：麗江出口特大白雲豆 500g
選自淘寶一家賣原食材的店：
其實我都唔想系大陸買食材，但問過所有香港的烘焙店，都說白豆蓉只是中秋節前後才有供應，其他時間想訂都無得訂。一般雜貨舖，連白豆是甚麼都不認試，通常都係比眉豆你，再講是「白鳳豆」、「白雲豆」，就會話無得賣。網上再找台灣或日本的白豆蓉，有一些原來原料也是來自於中國，所以最後放棄了，橫掂香港買的紅豆、黃豆都是來自於大陸，我咁諗。
糖霜：二德惠糖霜 250g
(8月3日更新)新三井製糖株式會社 200g 購自Sweet Decorations油麻地
(圖片來源：http://3hofood.com/image/cache/data/product/75-500x500.jpg)
色粉：Sugarflair Blossom Tint 7g (sweet decorations)
工具：
粉篩 : 購自Sweet Decorations油麻地 $20
呢個一定要介紹，因為壓蓉時要用力，差唔到每壓一次都整爛一個篩，但係呢個只係$20，好實淨，篩又夠密，壓一次就搞掂。
圖片來源http://www.momomall.com.tw/goodsimg/100/658/1458/556/1006581458556_L1.jpg
唧花咀：淘寶 - 八九烘焙
我在淘寶買過好多唔同的唧花咀，好多都係話來自韓國的都有買過，但最後我竟然覺得呢間平平地的咀最好用，當然我係無同wilton比較過，因為我諗住平平地買來試下先，用到差唔多先買靚野。
製作方法：
1. 洗豆、浸豆：我會用洗蔬菜粉浸20分鐘，再洗兩次。之後浸6-9個鐘過程中最好換兩、三次水，浸到完全見唔到有皺紋，發大大概兩倍，就可以去豆殼。
2. 煲豆：沖一下無殼的豆肉，煲30分鐘左右。時間方面其實很難講，最重要係抽一、兩粒出來，用手試下係咪一揀就爛，咁就係得。個樣大概好似以下咁。
3. 壓豆蓉：用粉篩續少續少的壓，這個過程係最辛苦，不過真係諗唔到有其他的機器可以代替人手。唯有一邊壓一邊煲下劇，分散注意力。
4. 煮豆蓉：將壓好的豆蓉加糖霜，用慢火煮10-15分鐘，一邊煮，一邊攪動豆蓉以免底部過熱。500g的豆如果落哂250g的糖霜，我會覺得係太甜，所以後來我只落一半130g左右，不過甜味的接受程度其實是每個人都不同，所以最好自己一邊煮一邊試味。
5. 豆蓉處理：一包500g的白豆，煮好後，大概會有1.2kg的白豆蓉，所以其實自己做的好處就係又無落添加劑，又可以控制甜度，而且價錢重好平。
將所有豆蓉分成兩包，每一包可以夠唧12個cupcakes或一個蛋糕面所需要用的花。把者時不用的白豆蓉放冰格，可以放一個月，要玩的時候解涷就得。
6. 豆蓉著色：由於sugarflair的色粉需要一些時間才可以把顏色完全和豆蓉溶合，所以千祈唔好見唔夠色就係咁落，落少少，少到拍兩下個色粉蓋咁多，等兩分鐘之後先再睇顏色是否不夠。另外，著色的步毈一定要用白燈下進行，因為通常都是晚上才有時間做，所以燈光好易不夠，顏色在黃燈下會被影響。
其實我現在覺得，做韓式豆蓉唧花，最難的部分並唔係唧花，而係顏色的控制，這方面我重未係掌握得好好，我會繼續系上色方面慢慢研究。
7. 之後可以入袋，如果覺得整支都不會換唧頭的話，是可以不用唧咀轉換器的，咁樣比較省豆蓉，可以把最後10ml的豆蓉都用盡，如果用左轉換器的話，就很難唧到尾。
